تجارتی رجسٹریشن اور تجارتی ناموں کے حوالے سے نئے قوانین کی منظوری

سعودی عرب میں کاروبار کرنے والے افراد کے لیے تجارتی رجسٹریشن اور تجارتی ناموں کے حوالے سے نئے قوانین کی منظوری دی گئی ہے۔
کاروباری معاملات کو ہموار بنانے اور مجموعی طور پر کام کے ماحول کو بہتر بنانا کے لیے سعودی مملکت نے تجارتی رجسٹریشن اور تجارتی ناموں کے لیے نئے قوانین کی منظوری دی ہے، منگل کو کابینہ کے ہفتہ وار اجلاس میں نئے قوانین منظور کیے گئے۔
سعودی وزیر تجارت ڈاکٹر ماجد القصبی نے بتایا کہ تجارتی رجسٹریشن کے حوالے سے نئے قوانین کی منظوری سے نہ صرف تاجروں کو فائدہ ہوگا بلکہ تجارتی اداروں کو قانونی معاملات کو بہتر بنانے میں سہولت ملے گی۔
ڈاکٹر ماجد القصبی نے کہا کہ یہ تجارتی ناموں کو محفوظ کرنے اور رجسٹریشن کے طریقہ کار کو بھی منظم کرتا ہے جو وژن 2030 کے تحت معاشی اور تیکنیکی ترقی کے مطابق ہے۔
ترجمان وزارت تجارت عبدالرحمن الحسین کا کہنا تھا کہ بین الاقوامی طریقوں کے مطابق نیا تجارتی رجسٹریشن نظام بنایا گیا ہے، کاروباری افراد خواہ وہ مملکت بھر میں کئی کاروبار چلا رہے ہوں ایک ہی تجارتی رجسٹریشن کرسکتے ہیں۔
قانون کی شق نمبر 29 کے حوالے سے وزارت تجارت کی ویب سائٹ پر بتایا گیا کہ اس شق میں کی جانے والی تبدیلیوں سے کمرشل رجسٹریشن کے اجرا کے معاملات میں کافی تیزی آئے گی، اس سے تاجروں کو فائدہ ہگا۔
اس منظور کے بعد کمپنیوں یا تجارتی اداروں کے لیے سی آر سسٹم کو اپ ڈیٹ کرنے کے لیے پانچ برس کی مہلت ملے گی۔ اس دوران کمپنی کی کمرشل رجسٹریشن کو اپنی ضرورت کے مطابق تبدیل کرایا جاسکے گا۔
کمرشل رجسٹریشن نظام میں کی جانے والی تبدیلیوں سے کمپنی کی ذیلی سی آر کے اجرا اور اسے کینسل کرکے مملکت کی سطح پر ایک ہی سی آر میں ضم کیا جاسکے گا۔