بلاول بھٹو زرداری نے عید میلادالنبی ﷺ کے بابرکت موقع پر قوم کو دلی مبارکباد پیش کی ہے۔ انہوں نے کہا کہ حضرت محمد ﷺ پوری انسانیت کے لیے رحمت بن کر آئے ہیں اور آپ ﷺ کی زندگی کا ہر پہلو ہمارے لیے مشعل راہ ہے۔ بلاول بھٹو زرداری نے مزید کہا کہ پیغمبرِ اسلام ﷺ کا پیغام ہر زمانے اور مقام سے بالاتر ہے اور وہ تمام نسلوں و قوموں کے لیے رہنمائی ہے۔
انہوں نے اس بات پر زور دیا کہ پاکستانی قوم کو نبی اکرم ﷺ کی تعلیمات کی روشنی میں ایک بہتر معاشرے کے قیام کے لیے جدوجہد کرنی ہوگی، ایک ایسا معاشرہ جہاں امن، برداشت اور بھائی چارے کی فضا قائم ہو۔ بلاول بھٹو زرداری نے کہا کہ ہمیں اپنے پیارے نبی ﷺ کی تعلیمات کی پیروی کرتے ہوئے دوسروں کی زندگیوں میں آسانیاں اور سکون پیدا کرنے کی کوشش کرنی چاہیے اور اپنے ذاتی اور اجتماعی معاملات میں ان اقدار کو اپنانا چاہیے جن کی حضرت محمد ﷺ نے تعلیم دی۔
