کراچی کے مختلف علاقوں میں آج بھر بدترین ٹریفک جام دیکھنے میں آیا گاڑیوں میں موجود ہزاروں شہری سڑکوں پر پھنس کر رہ گئے۔
کراچی کے علاقے کورنگی کراسنگ پر بدترین ٹریفک جام کے باعث ہزاروں شہری رُل گئے، کورنگی ندی سے کورنگی ناصر جمپ جانے والی مکمل طور پر سڑک بند ہوگئی۔
اس کے علاوہ قیوم آباد سے کورنگی کراسنگ جانے والے روڈ پر گاڑیوں کی کبی قطاریں لگ گئیں، صورتحال پر قابو پانے والے ٹریفک پولیس کے افسران و اہلکار سڑکوں سے غائب ہیں۔
اس حوالے سے ذرائع کا کہنا ہے کہ لانڈھی قائد آباد میں ایک جماعت کی جانب سے منعقدہ جلسے کے باعث انڈسٹریل ایریا سے آنے والے ہیوی ٹریفک کو ناصر جمپ کی طرف سے کورنگی کراسنگ کی جانب بھیجا جارہا ہے۔ ایک شہری نے کہا کہ گزشتہ 2گھنٹے سے کورنگی کراسنگ پر ٹریفک جام کی یہی صورت حال درپیش ہے جائیں تو کہاں جائیں؟
علاوہ ازیں آج شہر کے مختلف علاقوں لیاقت آباد تین ہٹی اور اطراف کے علاقوں میں ٹریفک جام کے باعث شہریوں کو شدید مشکلات کا سامنا رہا۔
