وزیراعظم شہباز شریف اور صدر مملکت آصف زرداری سمیت دیگر رہنماؤں نے بلوچستان کے علاقے موسیٰ خیل میں مسافروں کو گاڑیوں سے اتار کر قتل کرنے کے دہشت گرانہ فعل کی شدید الفاظ میں مذمت کی ہے جبکہ وزیراعظم نے سانحہ موسیٰ خیل کی فوری تحقیقات کا حکم دے دیا۔
وزیراعظم شہباز شریف نے بلوچستان کے علاقے موسیٰ خیل میں مسافروں کو گاڑیوں سے اتار کر قتل کرنے کے دہشت گرانہ فعل کی شدید الفاظ میں مذمت کرتے ہوئے واقعے کی رورپٹ طلب کر لی۔
وزیراعظم
وزیراعظم شہباز شریف نے موسیٰ خیل میں مسافر بس پر دہشت گرد حملے پر شدید غم و غصے کا اظہار کرتے ہوئے شہداء کے لیے دعائے مغفرت کی اور شہداء کے لواحقین کے لیے صبر جمیل کی دعا کی۔
وزیراعظم نے مقامی انتظامیہ کو لواحقین سے مکمل تعاون اور زخمیوں کو فوری طبی امداد کی فراہمی کی ہدایت کرتے ہوئے قانون نافذ کرنے والے اداروں کو واقعے کی فوری تحقیقات کی ہدایت کی ہے۔
شہباز شریف کا کہنا تھا کہ ملک میں کسی بھی قسم کی دہشت گردی قطعاً قبول نہیں، موسیٰ خیل واقعے کے ذمہ دار دہشت گردوں کو سزائیں دی جائیں گی۔
ان کا مزید کہنا تھا کہ ملک سے دہشت گردی کے مکمل خاتمے تک دہشت گردوں کے خلاف جنگ جاری رہے گی۔
