پی ایم ڈی سی میں منظور نظر کو نوازنے کی مبینہ تیاری

پاکستان میڈیکل اینڈ ڈینٹل کونسل (پی ایم ڈی سی) میں رجسٹرار کے عہدے پر منظور نظر کو نوازنے کی مبینہ تیاری ہو رہی ہے، پی ایم ڈی سی انتظامیہ نے رجسٹرار کی تعیناتی کے لیے قوانین میں مبینہ رد و بدل کر دیا۔
تفصیلات کے مطابق پی ایم ڈی سی میں رجسٹرار کے عہدے پر منظور نظر کو نواز نے کی مبینہ تیاری کی جا رہی ہے، سرکاری دستاویزات کے مطابق رجسٹرار کے عہدے کے لیےعمر کی حد 50 سے بڑھا کر 57 برس کر دی گئی ہے۔
دستاویزات کے مطابق رجسٹرار کے عہدے کے لیے مطلوبہ تجربے کی مدت بھی 15 سال سے کم کر کے 10 برس کر دی گئی ہے، منظورِ نظر امیدوار کے لیے عمر کی حد زیادہ اور تجربہ کم کیا گیا۔
واضح رہے کہ رواں سال ڈاکٹر شائستہ کو قائم مقام رجسٹرار کے عہدے سے ہٹایا گیا تھا، دستاویزات کے مطابق ڈاکٹر شائستہ کے خلاف شوکاز نوٹسز اور وارنٹ گرفتاری بھی جاری ہوئے تھے۔
صدر پی ایم ڈی سی ڈاکٹر رضوان نے مؤقف پیش کیا کہ ڈاکٹرز کے کم رجحان کی وجہ سے کونسل نے پی ایم ڈی سی کا قانون تبدیل کیا ہے۔ دوسری طرف ڈاکٹروں کی ایسی بڑی تعداد سامنے آئی ہے جن کا کہنا ہے کہ وہ رجسٹرار کے عہدے کے لیے امیدوار ہیں۔
صدر پی ایم اے ڈاکٹر شاہد ملک نے کہا ہے کہ پی ایم ڈی سی میں تعیناتیاں میرٹ پر ہونی چاہئیں۔ ڈاکٹر شائستہ نے بھی اپنا مؤقف پیش کیا ہے کہ انھیں شوکاز دیا گیا اور عہدے سے ہٹایا گیا، اب وہ رجسٹرار کے لیے امیدوار نہیں ہیں