کراچی: کسٹمز اور قانون نافذ کرنے والے اداروں نے ناردرن بائی پاس کے قریب مشترکہ کارروائی کرتے ہوئے ایک فارم ہاؤس اور پیٹرول پمپ پر چھاپہ مارا، جہاں سے مبینہ طور پر ایرانی ڈیزل کا بھاری ذخیرہ برآمد کرلیا گیا۔
ذرائع کے مطابق کارروائی کے دوران فارم ہاؤس اور پیٹرول پمپ میں ذخیرہ کیا گیا ایرانی ڈیزل قبضے میں لے لیا گیا، جبکہ متعلقہ اداروں نے مزید قانونی کارروائی شروع کردی ہے۔
ذرائع کا دعویٰ ہے کہ مذکورہ مقامات پر ایرانی ڈیزل ذخیرہ کرنے کا غیر قانونی کاروبار جاری تھا۔
ذرائع کے مطابق کارروائی کی زد میں آنے والے فارم ہاؤس اور پیٹرول پمپ کی ملکیت مبینہ طور پر ایس ایچ او غلام حسین کورائی سے منسوب کی جا رہی ہے۔ تاہم اس دعوے کی آزادانہ طور پر تصدیق نہیں ہوسکی۔
متعلقہ اداروں کی جانب سے برآمد شدہ ڈیزل کی مقدار اور کارروائی سے متعلق مزید تفصیلات سامنے آنا باقی ہیں۔
