تہران: ایران کے سپریم لیڈر آیت اللہ مجتبیٰ خامنہ ای نے کہا ہے کہ امریکا اور اسرائیل کی جانب سے ایران کو پسماندگی کی طرف دھکیلنے کی کوشش ناکام ہوچکی ہے اور ایران اب ماضی کے دور میں واپس نہیں جائے گا۔
ڈیفنس ویک اور حزب اللہ کے شہید سربراہ سید حسن نصراللہ کی دوسری برسی کے موقع پر جاری بیان میں مجتبیٰ خامنہ ای نے کہا کہ وہ وقت دور نہیں جب بحیرہ عرب بھی دشمن سے پاک ہوجائے گا۔
ایرانی میڈیا کے مطابق سپریم لیڈر نے کہا کہ بعض حلقوں کی جانب سے ایران کو چوتھی سپر پاور قرار دیا جاتا ہے، تاہم اللہ نے چاہا تو ایران دنیا کی سب سے بڑی طاقت بنے گا۔
انہوں نے مزید کہا کہ ماضی میں دشمن نے جنوبی ایران کے دونوں اطراف کے سمندری علاقوں کو اپنے لیے میدان بنایا ہوا تھا، تاہم آبنائے ہرمز کے دفاع کی وجہ سے اب دشمن بحیرہ عرب سے آگے بڑھنے کی جرأت نہیں کرتا۔
مجتبیٰ خامنہ ای نے کہا کہ امریکا اور اسرائیل کی ایران کو پسماندگی کی جانب دھکیلنے کی کوششیں کامیاب نہیں ہوئیں۔ انہوں نے حزب اللہ کے سابق سربراہ سید حسن نصراللہ کو عرب ہیرو اور مزاحمتی محاذ کی عظیم علامت بھی قرار دیا۔
