ریاض: سعودی عرب کے مختلف شہروں میں حوثیوں کی جانب سے ممکنہ ڈرون حملوں کے خدشے کے پیشِ نظر شہری دفاع نے مکہ مکرمہ، طائف اور جدہ میں ہنگامی انتباہ جاری کردیا۔
سعودی شہری دفاع کے مطابق ابہا اور خمیس مشیط میں بھی ممکنہ خطرے کے پیشِ نظر دوبارہ الرٹ جاری کیا گیا ہے۔ شہریوں کو ہدایت کی گئی ہے کہ وہ جاری کردہ حفاظتی ہدایات پر سختی سے عمل کریں اور اپنی حفاظت کو یقینی بنائیں۔
دوسری جانب جدہ میں ولی عہد شہزادہ محمد بن سلمان کی زیرِ صدارت سعودی کابینہ کا اجلاس ہوا، جس میں شہری اہداف پر حوثیوں کے مسلسل اور دانستہ حملوں کی شدید مذمت کی گئی۔
سعودی ولی عہد نے مملکت کی خودمختاری اور اہم مفادات کے دفاع کے حق کا اعادہ کرتے ہوئے کہا کہ سعودی سرزمین کے تحفظ پر کوئی سمجھوتا نہیں کیا جائے گا۔
شہزادہ محمد بن سلمان نے کابینہ کو وزیراعظم پاکستان اور امریکی سینٹرل کمانڈ کے سربراہ جنرل بریڈ کوپر کے ساتھ ہونے والی گفتگو کی تفصیلات سے بھی آگاہ کیا۔
اجلاس کے دوران سعودی کابینہ نے خطے سمیت دنیا بھر میں ہونے والی اہم سیاسی اور سکیورٹی پیشرفت کا بھی جائزہ لیا۔
