اکنامک پالیسی اینڈ بزنس ڈویلپمنٹ تھنک ٹینک نے ایف پی سی سی آئی کے تعاون سے شیڈو بجٹ 2026-27 جاری کر دیا ہے، جس پر احمد نواز سکھیرا کے دستخط ہیں۔
شیڈو بجٹ میں کارپوریٹ ٹیکس 29 فیصد سے کم کر کے 25 فیصد کرنے، بینکوں کے علاوہ تمام شعبوں پر سپر ٹیکس ختم کرنے اور انٹرکارپوریٹ ڈیویڈنڈ پر ودہولڈنگ ٹیکس ختم کرنے کی سفارش کی گئی ہے۔
تھنک ٹینک نے تنخواہ دار طبقے پر ٹیکس کی شرح 35 فیصد سے کم کر کے 20 فیصد کرنے اور سالانہ 8 لاکھ روپے تک آمدن پر ٹیکس ختم کرنے کا مطالبہ بھی کیا ہے۔
تجاویز میں ودہولڈنگ ٹیکس کی کیٹیگریز 52 سے کم کر کے 32 کرنے، آئندہ تین برسوں میں سیلز ٹیکس 18 فیصد سے کم کر کے 15 فیصد کرنے، نان فائلرز کی کیٹیگری ختم کرنے اور ریٹیلرز و مرچنٹس کو ٹیکس نیٹ میں لانے کی سفارش شامل ہے۔
رئیل اسٹیٹ سیکٹر کے لیے ٹیکس شرح 5.5 فیصد سے کم کر کے 0.5 فیصد مقرر کرنے، ٹیکس ری فنڈز فوری جاری کرنے اور عدالتوں میں زیر التوا 5700 ارب روپے کے مقدمات کے فوری فیصلے کا بھی مطالبہ کیا گیا ہے۔
مزید برآں، ایف بی آر کی تنظیم نو، اہل اور جوابدہ چیئرمین کی تین سالہ تعیناتی، کسٹمز اور انکم ٹیکس کے علیحدہ بورڈز کے قیام اور ایف بی آر بورڈ میں نجی شعبے کی شمولیت کی سفارش بھی کی گئی ہے۔
