وفاقی دارالحکومت اسلام آباد ایک بار پھر عالمی سفارتی سرگرمیوں کا مرکز بننے جا رہا ہے، جہاں امریکا اور ایران کے درمیان امن مذاکرات کے دوسرے دور کی تیاریاں آخری مراحل میں داخل ہو گئی ہیں۔
ذرائع کے مطابق وفود کی متوقع آمد کے پیش نظر شہر میں سیکیورٹی کو ہائی الرٹ کر دیا گیا ہے اور پنجاب کے 10 اضلاع سے پولیس کی اضافی نفری طلب کر لی گئی ہے، جبکہ اسلام آباد بھر میں تقریباً 18 ہزار اہلکار تعینات کیے جائیں گے۔
حکام کا کہنا ہے کہ توسیع شدہ ریڈ زون کو مکمل طور پر سیل کیا جائے گا، جبکہ فائیو اسٹار ہوٹلز، کنونشن سینٹرز اور اہم سرکاری و سفارتی مقامات کے گرد سیکیورٹی کے سخت انتظامات کیے جا رہے ہیں۔
مزید برآں شہر کیلئے ایک جامع ٹریفک پلان بھی تیار کر لیا گیا ہے، جس کے تحت مختلف اہم شاہراہوں کو بند رکھا جائے گا۔ میڈیا کے لیے خصوصی مرکز قائم کیا جائے گا اور رسائی محدود رکھنے کا فیصلہ کیا گیا ہے۔
ذرائع کے مطابق سیکیورٹی خدشات کے باعث موبائل سروس معطل رکھنے کی تجویز بھی زیر غور ہے، جبکہ مذاکرات کے دوران مقامی تعطیل کا امکان بھی ظاہر کیا جا رہا ہے۔
حکام نے بتایا ہے کہ وزیراعظم کی وطن واپسی پر ان تیاریوں سے متعلق تفصیلی رپورٹ پیش کی جائے گی۔
