اسلام آباد: حکومت نے آئی ایم ایف سے آئندہ مذاکرات میں ریلیف لینے کی تیاری کر لی ہے اور کچھ شعبوں میں رعایتیں حاصل کرنے کی حکمت عملی طے کی جا رہی ہے۔ وزارت خزانہ کے ذرائع کے مطابق پاکستان آئی ایم ایف سے ٹیکس وصولیوں کے ہدف اور توانائی کی قیمتوں میں کمی کا مطالبہ کرے گا، جبکہ مذاکرات کے دوران ازسرنو ترجیحات بھی طے کی جائیں گی۔
ذرائع کا کہنا ہے کہ متعلقہ محکموں کو دو ہفتوں میں ریلیف سے متعلق تجاویز وزارت خزانہ کو فراہم کرنے کی ہدایت کر دی گئی ہے۔ وزارت صنعت و پیداوار صنعتی شعبے کے لیے مشکلات کم کرنے کی تجاویز تیار کر رہی ہے جبکہ وزیراعظم نے آئی ایم ایف سے صنعتوں کی بحالی کے لیے ریلیف حاصل کرنے کی پالیسی بنانے کی ہدایت کی ہے۔
ذرائع کے مطابق آئی ایم ایف کے مینیجنگ ڈائریکٹر نے قرض پروگرام میں رہتے ہوئے مکمل تعاون کی یقین دہانی کرائی ہے۔
