امریکی صدر ڈونلڈ ٹرمپ نے ایک اہم بیان میں کہا ہے کہ روس اور چین کے ساتھ مل کر ایٹمی ہتھیار ختم کرنے کے منصوبے پر کام کیا جا رہا ہے۔
امریکی صدر ڈونلڈ ٹرمپ نے بدھ کے روز کہا کہ وہ ممکنہ طور پر چین اور روس کے ساتھ مل کر جوہری ہتھیاروں کے خاتمے (ڈی نیوکلیئرائزیشن) کا ایک منصوبہ تیار کر رہے ہیں، تاہم انھوں نے اس حوالے سے کوئی تفصیلات فراہم نہیں کیں۔
ٹرمپ نے میامی میں امریکن بزنس فورم سے خطاب کرتے ہوئے کہا: ’’ہم نے اپنا جوہری نظام دوبارہ منظم کیا ہے، ہم دنیا کی سب سے بڑی جوہری طاقت ہیں، جس کا اعتراف کرنا مجھے ناگوار گزرتا ہے کیوں کہ یہ ایک خوف ناک بات ہے۔‘‘
انھوں نے مزید کہا: ’’روس دوسرے نمبر پر ہے، جب کہ چین کافی پیچھے ہے، لیکن وہ 4 یا 5 سال میں ہماری سطح پر پہنچ جائے گا۔ ہم تینوں ملک مل کر جوہری ہتھیاروں کے خاتمے کا کوئی منصوبہ تیار کر رہے ہیں، دیکھتے ہیں یہ کام کرتا ہے یا نہیں۔‘‘
واضح رہے کہ امریکا اور روس کے درمیان ایک بار پھر خطرناک جوہری ہتھیاروں کی دوڑ شروع ہو گئی ہے، گزشتہ روز روس کے صدر ولادیمیر پیوٹن نے انکشاف کیا تھا کہ روس نے ایک اور ایٹمی صلاحیت رکھنے والے میزائل اوریشنِک کی سلسلہ وار تیاری شروع کر دی ہے۔ روس نے اس سے قبل ایٹمی صلاحیت والے بیوریویستنک کروز میزائل اور پوسائیڈن زیرِ آب تارپیڈو کے تجربات بھی کیے ہیں۔امریکی صدر ڈونلڈ ٹرمپ نے بھی محکمہ دفاع کو دیگر ایٹمی طاقتوں کے برابر نیوکلیئر تجربات دوبارہ شروع کرنے کا حکم دے دیا ہے۔
