امریکی صدر ڈونلڈ ٹرمپ اور شی جن پنگ سے ملاقات میں اہم فیصلے

واشنگٹن (30 اکتوبر 2025): امریکی صدر ڈونلڈ ٹرمپ کا کہنا ہے کہ چینی ہم منصب شی جن پنگ سے ملاقات میں اہم فیصلے اور تقریباً تمام امور پر اتفاق ہوگیا۔
قطری نشریاتی ادارے الجزیرہ کی رپورٹ کے مطابق امریکی صدر ڈونلڈ ٹرمپ نے جنوبی کوریا میں چینی صدر شی جن پنگ سے اہم ملاقات کے بعد وطن واپسی کا سفر شروع کر دیا۔
ڈونلڈ ٹرمپ نے ایئر فورس ون میں صحافیوں سے گفتگو میں شی جن پنگ سے ملاقات کا مختصر احوال بتایا۔ امریکی صدر نے کہا کہ ملاقات کے دوران چینی صدر کے ساتھ بہت سے اہم فیصلے ہوگئے۔
انہوں نے ملاقات کو حیرت انگیز قرار دیتے ہوئے کہا کہ ہم نے شاندار فیصلے کیے ہیں، ہم بہت سے اہم نکات پر نتیجے پر پہنچے ہیں اور ہم وہ آپ کو تھوڑی دیر میں بتا دیں گے۔
ان کا کہنا تھا کہ چین کل خریداریوں کی بحالی کی منظوری کے بعد سویا بین فوراً خریدنا شروع کر دے گا، دوا فینٹینیل پر ہم نے اتفاق کیا ہے کہ وہ بہت محنت سے بہاؤ روکنے پر کام کریں گے۔
امریکی صدر نے بتایا کہ میں نے فینٹینیل سے متعلق چین پر ٹیرف 20 فیصد سے کم کر کے 10 فیصد کر دیا ہے۔
ملاقات کے بارے میں ڈونلڈ ٹرمپ کا مزید کہنا تھا کہ چینی صدر اور میں تقریباً ہر چیز پر متفق ہو گئے ہیں لیکن کچھ چیزیں زیر بحث نہیں آئیں، میں یہ نہیں کہوں گا کہ ہر چیز پر بات ہوئی ہے۔
امریکی صدر نے کہا کہ میں نے انویڈیا کے چین کو چپس فروخت کرنے پر بات کی لیکن کوئی پیشرفت نظر نہیں آئی، متعلقہ چپس بلیک ویل اے آئی چپس نہیں تھیں جو انویڈیا کی سب سے جدید ہیں۔
ان کا کہنا تھا کہ ملاقات میں ہم نے چین کی نایاب زمینوں پر برآمد کنٹرول پر توجہ دی اور وہ ان کو جاری رکھیں گے جو کافی اہم ہے، چین پر موجودہ ٹیرف کی شرح 57 فیصد سے کم کر کے 47 فیصد کر دی گئی ہے۔
واضح رہے کہ دونوں صدور کی ملاقات کے بارے میں وائٹ ہاؤس نے ابھی تک مکمل تفصیلات جاری نہیں کیں۔