وزیراعظم کا گھریلو صارفین کیلئے ملک بھر میں گیس کنکشنز کھولنے کا اعلان

اسلام آباد(26 اکتوبر 2025): وزیراعظم شہباز شریف نے کہا ہے کہ گھریلو صارفین کے لیے ملک بھر میں گیس کنکشنز کھولنے کا فیصلہ کیا گیا ہے۔
اسلام آباد میں آر ایل این جی گیس کنکشنز کے اجرا کی تقریب سے خطاب کرتے ہوئے وزیراعظم شہباز شریف نے کہا کہ آج عوام کا ایک دیرینہ مطالبہ پورا ہوگیا ہے، گھریلو صارفین کیلئے ملک بھر میں گیس کنکشنز کھولنے کا فیصلہ کیا گیا ہے۔
وزیراعظم شہباز شریف کا کہنا تھا کہ 2022 میں پی ڈی ایم حکومت کے دوران گیس کی فراہمی اہم چیلنج تھا، آج سے عوام کیلئے معیاری ایندھن آر ایل این جی  کے کنکشنز کا اجرا کیا جارہا ہے۔
وزیراعظم کا کہنا تھا کہ پی ڈی ایم حکومت کے دور میں گیس انفرا اسٹرکچر کی تعمیر کے اقدامات کئےگئے، مخلوط حکومت میں شامل تمام سیاسی رہنماؤں کو مبارکباد پیش کرتا ہوں۔
وزیراعظم شہباز شریف نے مزید کہا کہ ن لیگ کی حکومت نے ملک سے اندھیروں کے خاتمے کیلئے بھرپور اقدامات کئے، ہم نے شبانہ روز محنت کرکے ملک کو  ترقی کی راہ پر گامزن کرنا ہے۔