اسلحہ ڈیلرز کے لائسنس منسوخ اور جعلی ڈیلرز کی دکانیں سیل

لاہور : محکمہ داخلہ پنجاب نے 28 اسلحہ ڈیلرز کے لائسنس منسوخ کر دیے اور جعلی ڈیلرز کی دکانیں سیل کردی گئیں۔
تفصیلات کے مطابق محکمہ داخلہ پنجاب نے صوبے بھر میں غیرقانونی اسلحے کی خرید و فروخت کے خلاف کارروائی کرتے ہوئے 28 اسلحہ ڈیلرز کے لائسنس منسوخ کر دیے۔
ذرائع کے مطابق غیرقانونی اسلحے کے جعلی ڈیلرز کی دکانیں سیل کرکے ان کے خلاف قانونی کارروائی شروع کر دی گئی ہے۔
محکمہ داخلہ نے واضح کیا ہے کہ اسلحے کی غیر قانونی خرید و فروخت پر زیرو ٹالرنس پالیسی اپنائی جا رہی ہے۔ اس سلسلے میں صوبے بھر کے اسلحہ ڈیلرز کی ویری فکیشن اور ڈیجیٹل رجسٹریشن کا عمل جاری ہے۔
ذرائع کے مطابق پنجاب میں مجموعی طور پر 511 اسلحہ ڈیلرز نے لائسنس کی توثیق کے لیے درخواستیں جمع کرائیں، جن میں سے 393 ڈیلرز کے لائسنس کی تصدیق کے بعد انہیں گرین سرٹیفکیٹ جاری کیے گئے ہیں تاہم 90 اسلحہ ڈیلرز کے کاغذات کی اسکروٹنی تاحال جاری ہے۔
اعداد و شمار کے مطابق پنجاب میں 10 لاکھ 12 ہزار 454 افراد کے پاس انفرادی اسلحہ لائسنس موجود ہیں، جبکہ سیکیورٹی کمپنیوں کو 37 ہزار 918 اور مختلف اداروں کے نام پر 42 ہزار 272 اسلحہ لائسنس جاری کیے گئے ہیں۔
ذرائع کا کہنا تھا کہ پنجاب میں اسلحہ لائسنسز کا تمام ریکارڈ نادرا کے تعاون سے آن لائن سسٹم میں منتقل کیا جا رہا ہے تاکہ شفافیت اور نگرانی کو بہتر بنایا جاسکے۔