قطر نے امریکا کی جانب سے سیکورٹی گارنٹی فراہم کرنے کے اعلان کا خیر مقدم کیا ہے۔
قطری وزارت خارجہ کے مطابق امریکی صدر ڈونلڈ ٹرمپ کے ایگزیکٹو آرڈر کا خیرمقدم کرتے ہیں یہ اقدام دوحا اور واشنگٹن کے دیرینہ تعلقات کی عکاسی ہے، امریکی ایگزیکٹیو آرڈر سے دونوں ممالک کے دفاعی تعلقات مزید مضبوط ہوں گ۔
قطر نے علاقائی امن کے فروغ میں امریکا کے کردار کو سراہتے ہوئے کہا ہے کہ واشنگٹن کا فیصلہ سلامتی و سفارتکاری میں دوطرفہ تعاون کو تقویت دے گا۔
ترجمان نے کہا کہ امریکا اور عالمی شراکت داروں کیساتھ ثالثی کا کردار جاری رکھیں گے خطے میں پائیدار امن کیلئے سفارتی ذرائع سے تنازعات حل کریں گے۔
امریکا نے دوحا پر اسرائیلی حملے کے بعد قطر کی سلامتی کی ضمانت دیتے ہوئے کسی بھی حملے کی صورت میں فوجی کارروائی کا اعلان کیا ہے۔
امریکی صدر ڈونلڈ ٹرمپ نے ایگزیکٹو آرڈر پر دستخط کر دیئے ہیں جس کے مطابق قطر پر حملہ ہوا تو امریکا جواب دے گا۔
ٹرمپ نے کہا کہ قطر کے دفاع کیلئے فوجی کارروائی سمیت تمام اقدامات کریں گے، قطر امن، استحکام اور خوشحالی کی جدوجہد میں امریکا کا ثابت قدم اتحادی ہے۔
ڈونلڈ ٹرمپ نے امریکا اور قطر کے تعلقات مزید مضبوط بنانے کا اعلان کرتے ہوئے کہا کہ امریکا اور قطر قریبی فوجی تعاون اور مشترکہ مفادات کے رشتے میں جڑے ہیں
