پاکستان میں رواں برس اسموگ میں واضح اضافے کا خدشہ ظاہر

لاہور : محکمہ موسمیات نے پاکستان میں رواں برس اسموگ میں واضح اضافے کا خدشہ ظاہر کردیا،عمومی طور پر اسموگ نومبر سے دسمبر کے دوران جاری رہتی ہے۔
تفصیلات کے مطابق محکمہ موسمیات نے اسموگ کے حوالے سے ایڈوائزری جاری کردی، جس میں کہا ہے کہ موسمیاتی تبدیلیوں کے باعث رواں برس سموگ میں واضح اضافے کا خدشہ ہے.
محکمہ موسمیات کا کہنا تھا کہ فیکڑیوں کی آلودگی اور گاڑیوں کا دھواں سموگ میں اضافے کا باعث بن سکتے ہیں ، عمومی طور پر اسموگ نومبر سے دسمبر کے دوران جاری رہتی ہے۔
ایڈوائزری میں کہا گیا کہ رواں برس پاکستان کے چند بڑے شہروں میں اسموگ میں اضافے کا خدشہ ہے، ان شہروں میں لاہور گوجرانولہ شیخوپورہ قصور اور فیصل آباد شامل ہیں۔
محکمہ موسمیات نے کہا کہ اسموگ میں اضافہ شہریوں کے صحت کے ساتھ ماحول کو بھی آلودہ کر سکتا ہے، دوران اسموگ متاثرہ شہروں میں دمہ کا مرض بڑھ سکتا ہے۔
ایڈوائزری میں مزید کہا گیا کہ بچے بزرگ اور قوت مدافعت کی کمی کا شکار افراد زیادہ متاثر ہو سکتے ہیں، اس دوران حد نگاہ کم ہونے کے باعث ٹریفک حادثات کا خطرہ بھی زیادہ ہے۔