وفاقی حکومت کا پانچ سال کا نجکاری منصوبہ سامنےآگیا

اسلام آباد : وفاقی حکومت کا پانچ سال کا نجکاری منصوبہ سامنےآگیا، جس میں بتایا گیا کہ 2024 سے 2029 تک کن اداروں کی نجکاری کی جائے گی؟
تفصیلات کے مطابق وفاقی حکومت کا تیار کردہ 5 سالہ 29-2024 نجکاری پلان سامنے آگیا، جس میں بتایا کہ پلان کے تحت 3 مراحل میں 24 اداروں کی نجکاری کی جائے گی۔
دستاویز میں کہا گیا کہ پہلے مرحلے میں ایک سال میں10اداروں کی نجکاری کاپلان ہے ، دوسرے مرحلے کے تحت 3 سال میں 13اداروں اور تیسرے مرحلے کے تحت 3 سے 5 سال میں ایک ادارے کی نجکاری ہوگی۔
دستاویز میں کہا کہ پہلے مرحلے میں پی آئی اے اور روز ویلٹ ہوٹل نیویارک ، زرعی ترقیاتی بینک ، فرسٹ ویمن بینک کی نجکاری ہوگی جبکہ ہاؤس بلڈنگ فنانس کارپوریشن ، پاکستان انجینئرنگ کمپنی، سندھ انجینئرنگ لمیٹڈ کا نجکاری عمل پہلے مرحلے میں مکمل ہوگا۔
دستاویز میں مزید کہنا تھا کہ اسلام آباد، فیصل آباد ،گوجرانوالہ بجلی کمپنیوں کی نجکاری بھی پہلےمرحلےمیں ہو گی۔
پلان کے تحت یوٹیلیٹی اسٹورزکارپوریشن کا نجکاری عمل دوسرےمرحلےمیں مکمل ہوگا، دوسرےمرحلےمیں بجلی تقسیم کار کمپنیوں لیسکو، میپکو، حیسکو، سیپکو ، پشاور اور ہزارہ الیکٹرک سپلائی کمپنیوں کی نجکاری ہوگی۔
اس کے علاوہ جامشوروپاورکمپنی اورسینٹرل پاور جنریشن کمپنی ، ناردرن پاورجنریشن ،لاکھڑاپاور جنریشن کمپنی ، اسٹیٹ لائف ،پاکستان ری انشورنس کمپنی کی نجکاری دوسرے مرحلے میں ہوگی۔
پلان کے مطابق تیسرے اورآخری مرحلے میں پوسٹل لائف انشورنس کمپنی کی نجکاری کی جائے گی، وفاقی کابینہ کی منظوری کےبعد وزارت نجکاری کی جانب سے فہرست تیارکی گئی۔