کراچی: وزیراعلیٰ سندھ سید مراد علی شاہ کی زیر نگرانی سندھ ہائیر ایجوکیشن کمیشن اور ٹیک ویلی گوگل کے درمیان مفاہمتی یادداشت پر دستخط کی تقریب وزیراعلیٰ ہاؤس میں منعقد ہوئی۔ تقریب میں وزیر یونیورسٹی اینڈ بورڈ محمد علی ملکانی، چیف سیکریٹری آصف حیدر شاہ، اور دیگر اعلیٰ حکام موجود تھے۔
تقریب میں ٹیک ویلی کے ریجنل ہیڈ گریٹر ایشیا، مسٹر پال ہچنگس اور کنٹری ڈائریکٹر حارث سفیان نے بھی شرکت کی۔ سندھ ہائیر ایجوکیشن کمیشن کی جانب سے سیکریٹری آئی ٹی نور احمد سموں اور سیکریٹری یو اینڈ بی عباس بلوچ نے یادداشت پر دستخط کیے۔
وزیراعلیٰ سندھ سید مراد علی شاہ نے تقریب سے خطاب کرتے ہوئے کہا کہ آج سندھ میں تعلیمی تبدیلی کے سفر کا ایک اہم دن ہے۔ انہوں نے اس شراکت داری کو صوبے کی یونیورسٹیوں اور طلباء کی ترقی کے لیے ایک بڑا اعزاز قرار دیا۔
وزیراعلیٰ نے مزید کہا کہ یہ تعاون 30 پبلک سیکٹر یونیورسٹیوں تک گوگل فار ایجوکیشن ٹولز کی رسائی فراہم کرے گا، جس سے 14,000 فیکلٹی ممبران اور تقریباً 2 لاکھ طلباء کو براہ راست فائدہ ہوگا۔
انہوں نے کہا کہ گوگل ورک اسپیس کے ذریعے اساتذہ کے تدریسی طریقہ کار میں اضافہ ہوگا اور حوصلہ افزائی اور سیکھنے کے جدید ماحول کو فروغ دیا جائے گا۔ وزیراعلیٰ نے انٹرایکٹو لرننگ ٹیکنیشن کے ذریعے طلباء کی مصروفیات بڑھانے، طلباء اور فیکلٹی کے درمیان ہموار تعاون کی سہولت فراہم کرنے اور جدید ترین تعلیمی وسائل تک رسائی کے مقاصد کا ذکر کیا۔
انہوں نے کہا کہ اس شراکت داری سے 1,500 اسکالرشپ کی پیشکش کی جائے گی، جو طلباء کو ڈیجیٹل معیشت کے لیے تیار کرے گی۔
وزیراعلیٰ نے اس موقع پر گوگل کی ٹیم کی محنت کا شکریہ ادا کرتے ہوئے کہا کہ یہ شراکت داری علم کو پروان چڑھانے کے عزم کی عکاسی کرتی ہے۔
یہ تقریب سندھ میں تعلیم کے مستقبل کی تشکیل میں ایک اہم سنگ میل ثابت ہوگی۔
